Sunday, 21 September 2008

“မိမိကိုယ်ကို မဲဇာသို့ပို့ခြင်း”

ရေးသူ- ဒဂုန်တာရာ

zzimage_mini.jpg

တရံရောခါ
ရာဇာသေနင်း၊ ရွှေစိတ်တော်နှင့်
ခန့်မသင့်၍၊ ဘုရင့်အာဏာစက်
လက်ဝဲသုန္ဒရ၊ မင်းခ ကဗျာဆရာ
မဲဇာသို့ ပို့လိုက်သတည်း။

ငါ တစ်မူကား
မည်သူကမျှ၊ အမိန့်မချ
မိမိဆန္ဒဖြင့်၊ မြို့ပြမှ ခွာ
မဲဇာသို့ သွားနေလိုက်သည်။

ခေတ်သစ်မဲဇာ
ထိုနေရာကား၊ ကတ္တရာလမ်းမှ
ဝေးကွားလှလျက်၊ လယ်ကွင်းတစ်ဘက်
တစ်ဘက်မှာတော၊ တောင်တစ်ကြောနှင့်
အပြောကျယ်စွာ၊ ကောင်းကင်ပြာနှင့်
ဘယ်မှာကြည့်လေ၊ စိမ်းမြကြွေနှင့်
ရေကန်အတွင်း၊ နေနှစ်စင်းတည်း
ထွက်စပုလဲ၊ ၀င်ကရွှေဝါ
နေစကြာ၊ လစကြာ၊ ရေကန်သာတွင်
ဖန်လွှာ မှန်လွှာ၊ ရေကန်သာတွင်
စကြာမှန်ပြောင်း လှည့်လည်လျက်။




ကြယ်၊ လ၊ နေနှင့်
ရေမြေကောင်းကင်၊ သစ်ပင်တောတောင်
အမှောင် အလင်း၊ နဂိုရင်းဖြင့်
ဖုံးခြင်းမရှိ၊ ကွယ်ခြင်းမရှိ
ပကတိအဖြစ်၊ ရိုးဖြောင့်လှစ်ပြ
အစစ်အမှန်၊ အရိုးခံလျှင်
သဘာဝ၏ ဟန်အတိုင်း။

တစ်နေရာတွင်
ရှေ့မှာလယ်ကွင်း၊ ရေဆင်းချောင်းစပ်
ကွေ့ပတ်ခွေရစ်၊ လှိုင်မြစ်သို့ထွက်
လယ်ကွက် ကန်သင်းကြား၊ ဖြတ်သန်းသွားရာ
ငါးများခုန်ထွက်၊ ဂဏန်းတက်ကြ
ရေစအိုင်နား၊ ချဉ်ပေါင်ခါးပြင်
လယ်ကန်စွန်းပင်၊ စားချင် ခူးသွား
ဖထီးစကား၊ ကြားရလေပြန်
သူ့ ဆီးခြံအပေါက်ဝ၊ တစ်ခေါ်လောက်ဝေး
ရွှံ့စေးလမ်းမှ၊ လျှောက်ခဲ့ရသည်
အေးချမ်းပေစွ။

မိုးသက်လေဆင်
ရေပြင်လယ်ကွင်း၊ ရွှေရောင် ငွေရောင်
မြရောင် စိန်ရောင်၊ တိမ်တောင် ရိပ်ထင်
စိမ်းမျှင်စန၊ မြတုံးမျှောတင်
နေ့တွင် ဖိတ်လက်၊ ညတွင် မှိုင်းမြ
လမှုန်၊ ကြယ်မှုန်၊ စံပယ်စုံ ကန်စွန်းငုံ
ဖြူငုံလူးလွန့်
ရေတွင်ကူးခပ်၊ တဖျတ်ဖျတ်တည့်
ရေစပ်လယ်ခင်း၊ ဖြူဖွေးကြွ။

ကောက်စိုက်ချိန်တွင်
ရေပြင်ဖွေးဖွေး၊ မိုးရိပ်ပြေးလွှား
နေ့စားလုပ်သား၊ ကောက်စိုက်သမများ
လှုပ်လှုပ်ရွရွ၊ ထဘီတိုမ
ဂဒူးဆောင်းကြ၊ ခမောက်ဆောင်းကြ
ကားချပ်ခြယ်သ၊ ဘ၀ရသ
လှပပေစွ။

နေ့အခါတွင်၊ ဟင်းလင်းပြင်မို့
လေထန်းပြင်းပြင်း၊ ရိုက်ခတ်ထုတ်ချင်း
နှုတ်သီးကောက်စွ၊ မြေမွခြစ်ကာ
အစာရှာကြ၊ အော်မြည်ကြနှင့်
ဘဲတစ်မလည်း၊ ရေစချောင်းတိမ်
မြည်ကျူးသံယှက်၊ ကြက်သံ ဘဲသံ
ညယံတွင်ကား၊ ဖားအော်သံကား
ပိုးမွှားပုစဉ်းသံ၊ ပရစ်သံတို့
တစ်ယံမဆိတ်၊ တောသံခိပ်မှာ
သာယာပေစွ။

ဤမဲဇာကျွန်း
စခန်းသာမော၊ ကျေးလက်တောတွင်
ငါလျှင် မွေ့ပျော်၊ တစ်ကိုယ်တော်တည့်
ရေးဖော် မရှိ၊ ဖတ်ဖော် မရှိ
ဝေဖန်သူ မရှိ၊ တိုက်ခိုက်သူ မရှိ
အမိန့် မရှိ၊ လျှောက်လွှာ မရှိ
ငါ့ကို မသိ၊ ငါ့စာ မသိ
အမုန်း မရှိ၊ စစ်ပွဲ မရှိ
ပကတိထင်ဟပ်၊ စိမ်းရိုင်းလတ်ဆတ်
လွတ်လပ်နယ်မြေ၊ ငြိမ်းချမ်းမြေ။ ။


၃ - ၇- ၈၆
(မိုးဝေ၊ သြဂုတ်၊ ၁၉၈၆)
(စံပယ်ဖြူ မဂ္ဂဇင်း၊ အမှတ် ၉၊ စက်တင်ဘာ ၂၀၀၃၊ ဆရာကြီး ဒဂုန်တာရာ၏
“မုန်းသူ မရှိ၊ ချစ်သူသာ ရှိ၊ ရန်သူ မရှိ၊ မိတ်ဆွေသာ ရှိ” ဆောင်းပါးမှ ထပ်ဆင့်
ကူးယူ ဖော်ပြပါသည်။ အကြောင်းကြောင်းကြောင့် ဆရာကြီးထံမှ တိုက်ရိုက်
ခွင့်ပြုချက် မယူနိုင်ခဲ့မှုကို တောင်းပန်ပါသည်။)

2 comments:

KO said...

ကြေကွဲဖွယ်ရာပျူနိုင်ငံ

Wednesday, May 14, 2008 by မသက်ဇင်
ထိုင်းလင်း ခေါ် ယိုးဒယားရှမ်း များဝင်ရောက် မလာမှီ ယခု ထိုင်းလင်း ခေါ် ယိုးဒယားနိုင်ငံ တွင် အရှေ့  အာရှ တိုက်တောင်ပိုင်း အင်ဒိုချိုင်းနား ကျွန်းဆွယ် မဲနံမြစ်ဝှမ်း တ၀ိုက် တလျောက် ကြီးကျယ် ကောင်းစား ခဲ့ သည့် ခမာ လူမျိုးများ ၏ ကမ္ဗောဒီးယားနိုင်ငံ ခေါ် ကမ္ဗောဇ နိုင်ငံတော်ကြီး ရှိ သ ကဲ့ သို့ ၃ရာစု မတိုင်မှီက ပင် ဗီ ယက်နန် ဘက် တွင် စမ္ပပြည် များ တည်ရှိခဲ့သည် ကို ရှေးဟောင်းမြို့ ပျက် များ ၊ အဆောက်အဦး များ ၊ ရှေး ဟောင်း ကျောက်စာ များ တူး ဖေါ်တွေ့ ရှိခဲ့သည်၊ မွန်ရာဇ၀င်ဟောင်းများ ၌ မဲနံမြစ်ဝှမ်းမြောက်ပိုင်း ဒေသ အား ယောနကတိုင်း ဟရိပုဉ္စပြည် ၊ တောင်ပိုင်းဒေသ အား အယုဇ္ဈယတိုင်း ဒွါရာဝတီပြည်ဟု ဖေါ်ပြထားသည်။

ထို အချိန်ကာလ တွင် ထိုင်းရှမ်းများသည် တရုတ်ပြည်ယူနန်နယ် တွင် နန်ချို နိုင်ငံ အားတည်ထောင် ၍ တ ရုတ် ဧကရာဇ် အား လက်ဆောင်ဘဏ္ဍာ ဆက်သရသည့် တရုတ် လက်အောက်ခံ တိုင်းပြည်ဖြစ်သည်၊ ပျူ လူ မျိုးများ နှင့် ပတ်သက်သည့် သမိုင်းဝင် တရုတ် စာပေ ထန် ရာဇ၀င်ဟောင်း များမှ ကောက် နုတ် ဖေါ်ပြ ရလျှင် ပျူ လူမျိုး များ အား ၄ ရာစုလောက် က ပင် များစွာ တိုးတက် ယဉ်ကျေးသည့် လူမျိုး တမျိုး ဖြစ်ပြီး ၈ ရာစု လောက် တွင် ကြီးကျယ် ခန်းနား အံ့သြဖွယ် ရာ မြို့ ကြီး ၅ မြို့  နှင့် ပြည်နယ် ကလေးပေါင်း ၁၈ နယ်မျှရှိ ကြောင်း ဘုရင်မင်း ၏ အမည်ကား မဟာရာဇာ တည်း ။ အမတ်ချုပ် အမည် က မဟာသေနတည်း။ မင်းကြီး မဟာရာဇာ သည် ခရီးတိုသွားသည့် အခါ ရွှေကြိုးခတ် သည့် ထမ်းစင်စီးပြီး ။ ခရီးရှည်သွား လျှင် ဆင် စီး သည်။ မိဖုရားမောင်းမတရာကျော်ရှိသည်၊ မြို့ တော်တံတိုင်းဝန်းကျင်အားစဥ့်အုတ်နှင့်စီထားသည်။

ကျုံး ကမ်းပါး ကို အုတ်စီသည်။ တံတိုင်း အတွင်း ၌ သောင်းပေါင်းများ စွာသော မိသားစု များ နေထိုင်ကြပြီး ဗုဒ္ဓ ဘာသာဘုန်းကြီး ကျောင်း တရာကျော်ရှိသည်။ ကျောင်းပရ၀ုဏ် က အစ အခန်းများပါ ရွှေငွေ မွမ်းမံ၍အနီအ၀ါစသည့်တောက်ပသည့်ဆေးများရေးခြယ်ထားသည်။
ချိတ်ရောင်ခံ ဆေးသုတ်၍ ပန်းထိုး ကော်ဇောများဖြင့် ဖုံးလွှမ်းထားသည်။ လူ အများ သည် မေတ္တာရှေ့ ထားပြီး သတ္တ၀ါ အများ ကို သတ်ဖြတ်ညှင်းဆဲ ရန် ၀န်လေးသည်။ မာန်မာန နှိမ့်ချ ၍ရည်မွန်သည်ကိုတန်ဘိုးထားသည်။
စကားအပြောအဆိုနည်း၏ဗေဒင်ဆရာပေါသည်။ ဤ မျှကြီးကျယ် ထင်ရှားသည့် ပျူလူမျိုးများ သည် ၉ ရာစု လောက်တွင် နန် ချို ထိုင်းရှမ်းများ ၏ ပြင်းပြင်းထန်ထန် တိုက်ခိုက် ဖျက်ဆီးမှု ကို ခံ လိုက်ကြ ရသဖြင့် ပျူ လူ မျိုး များ တည်ထောင်ခဲ့ သည့်မြို့ ပြ ပြည်နယ် များသည် ပျက် စီးသွား ခဲ့ရသည်။ ထို့ အတူ လူမျိုး တမျိုး အဖြစ် ရပ် တည်နိုင်ခြင်း မရှိတော့ ပဲ ကစဥ့် ကလျား ဖြစ်သွားရ တော့ သည်။
ကျမ်းကိုး
မိတ်ဆိနာ-ခေတ်ဦးဖုနန်-ဖန်-ပျူ နှင့်ရခိုင်ယိုးဒယားသင်းဂျာနယ်။
ဒေါက်တာသန်းထွန်း ၏ ပျူတွေဘယ်ပျောက်သွားသလဲ
ဖန်ချုံ ( တရုတ်ရာဇဝင်ဆရာကြီး )
ထန်တရုတ်မှတ်တမ်းဟောင်းများ
ရှေးဟောင်းမြန်မာခေတ်ဦး ပုဂံ နယူးယောက်။ ဂျေဂျေအော်စတင်။ -၁၉၆၉ လုစ်
အရှေ့တောင်အာရှရာဇ၀င်၊ ဟော-၁၉၅၅
မြန်မာရာဇ၀င် (ဟာဗေး ၁၉၂၅)

ကိုအောင်(ပျူနိုင်ငံ) said...

ကျနော့်အနေဖြင့် ပျူလူမျိုးများ ပြိုကွဲပျက်စီးသွားသည်ဆို
သော် အချက်ကို လုံးဝ လက်မခံပါ။ ကျမ်းကိုး စာရင်းပါ
ပညာရှင်က ပျူများသည် ပုဂံခေတ်အထိ ဆက်လက်ရှိနေ
ကြောင်း အထောက်အထားများနှင့် တင်ပြ ထားပါတယ်။
ပုဂံသည် ပျူတို့ စတင်ထူထောင်ခဲ့သော မြို့စာရင်းဝင် မြို့တစ်မြို့ ဖြစ်ပါတယ်။ ဥပမာ ပြူစောထီး၏ မွေးစား မိဘနှစ်ပါးမှာ ပျူလူမျိုးများ ဖြစ်ပါတယ်။ ပျူနှင့် မြန်မာသည် မျိုးနွယ်တူရင်း များဖြစ်ပါတယ်။ တရုတ်ပြည် ချိ့အမ်းမှ တရုတ်တို့ ဖိအားကြောင့် ရွေ့ပြောင်းလာသော ပထမ အသုတ်ကို ပျူဟု လက်ခံပါတယ်။ နန်းကျောင်းတိုက်၍ ပျူမြို့ပြ သရေခေတ္တရာ ပျက်စီးပြီး ၀င်လာသူများမှာလည်း လမ်းခရီးတွင် ကျန်ခဲ့သော ပျူနွယ်တူ တိဗက်တိုများ သာ ဖြစ်ပါတယ်။ ကော်မန့် ရေးပေးတဲ့ အတွက် ကျေးဇူးများစွာ တင်ပါတယ် ခင်ဗျာ။